Simba yaikwepa Yanga SportPesa Super Cup
Beki
wa Simba, Feston Munezero (kulia) akiwania mpira na mchezaji wa Nakuru
All Stars, Mukhwana Sadiky katika mchezo wa SportPesa Super Cup
uliofanyika jana kwenye Uwanja wa Uhuru Dar es Salaam. Simba ilifungwa
kwa penalti 5-4. (Picha na Rahel Pallangyo).
Matokeo hayo ya kufungwa kwa Simba sasa yanaifanya timu hiyo kuwakwepa watani zao wa jadi, Yanga, ambayo juzi walitinga nusu fainali. Yanga jana walikaririwa wakisema kuwa wanataka kukutana na Simba katika fainali ya mashindano hayo ili kuishikisha adabu timu hiyo iliyomaliza ya pili katika msimamo wa Ligi Kuu Tanzania Bara.
Katika mchezo huo uliofanyika kwenye Uwanja wa Uhuru Dar es Salaam, timu hizo zilitoka suluhu katika dakika 90 za kawaida na kumsaka mshindi kwa matuta. Mchezaji aliyezamisha jahazi la Simba alikuwa kipa wa timu hiyo, Daniel Agyei baada ya kukosa penalti ya pili aliyoipiga na hivyo kutolewa kwa 5-4.
Hii ni mechi ya tatu kuamuliwa kwa matuta baada ya ile ya Yanga kuitoa Tusker kwa penalti 4-2, huku Singida United nayo ikitolewa kwa penalti na AFC Leopards kwa penalti 5-4 baada ya kutoka sare ya 1-1 katika dakika 90.
Kwa ushindi huo, Nakuru All Stars iliyopo katika ligi daraja la kwanza itacheza dhidi ya Wakenya wenzao, Gor Mahia katika mchezo wa nusu fainali utakaopigwa kesho Alhamisi. Katika mchezo huo wa Simba na Nakuru, timu zote zilishambuliana kwa zamu na kukosa nafasi kadhaa za wazi hadi kufikia hatua ya kupigia penalti.
Katika mchezo wa kwanza jana kwenye uwanja huo, Gor Mahia iliibuka na ushindi wa mabao 2-0 dhidi ya Jang’ombe Boys ya Zanzibar. Mabao ya washindi katika mchezo huo yalifungwa na Mid- die Kagere katika dakika ya 63 na 83.
Wachezaji wa Simba waliopata penalti ni Mwinyi Kazimoto, Hafidh Mussa, Feston Munezero na Jamvier Bukungu wakati Agyei alikosa. Wakati penalti za Nakuru All Stars zilifungwa na Nganga Peter, Amakanji Japheth, Siwa Omond, Maina Geofrey na Nturukundo Jerome.
Comments